१०. तरणियत्थेरअपदानं

३९. ‘‘सुवण्णवण्णो सम्बुद्धो, विपस्सी दक्खिणारहो;

नदीतीरे ठितो सत्था, भिक्खुसङ्घपुरक्खतो.

४०. ‘‘नावा न विज्जते तत्थ, सन्तारणी महण्णवे;

नदिया अभिनिक्खम्म, तारेसिं लोकनायकं.

४१. ‘‘एकनवुतितो कप्पे, यं तारेसिं नरुत्तमं;

दुग्गतिं नाभिजानामि, तरणाय इदं फलं.

४२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा तरणियो थेरो इमा गाथायो अभासित्थाति.

तरणियत्थेरस्सापदानं दसमं.

पदुमुक्खिपवग्गो सत्तवीसतिमो.