७. जवहंसकत्थेरअपदानं

२६. ‘‘चन्दभागानदीतीरे, आसिं वनचरो तदा;

सिद्धत्थं अद्दसं बुद्धं, गच्छन्तं अनिलञ्जसे.

२७. ‘‘अञ्जलिं पग्गहेत्वान, उल्लोकेन्तो महामुनिं;

सकं चित्तं पसादेत्वा, अवन्दिं नायकं अहं.

२८. ‘‘चतुन्नवुतितो कप्पे, यमवन्दिं नरासभं;

दुग्गतिं नाभिजानामि, वन्दनाय इदं फलं.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा जवहंसको थेरो इमा गाथायो अभासित्थाति.

जवहंसकत्थेरस्सापदानं सत्तमं.