१. आकासुक्खिपियत्थेरअपदानं

१. ‘‘सुवण्णवण्णं सिद्धत्थं, गच्छन्तं अन्तरापणे;

जलजग्गे दुवे गय्ह, उपागच्छिं नरासभं.

२. ‘‘एकञ्च पुप्फं पादेसु, बुद्धसेट्ठस्स निक्खिपिं;

एकञ्च पुप्फं पग्गय्ह, आकासे उक्खिपिं अहं.

३. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, पुप्फदानस्सिदं फलं.

४. ‘‘इतो छत्तिंसकप्पम्हि, एको आसिं महीपति;

अन्तलिक्खकरो नाम, चक्कवत्ती महब्बलो.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा आकासुक्खिपियो थेरो इमा गाथायो अभासित्थाति.

आकासुक्खिपियत्थेरस्सापदानं पठमं.