८. सत्तलिपुप्फपूजकत्थेरअपदानं

२७. ‘‘सत्त सत्तलिपुप्फानि, सीसे कत्वानहं तदा;

बुद्धस्स अभिरोपेसिं, वेस्सभुम्हि नरुत्तमे [विभत्तिविपल्लासो चिन्तेतब्बो].

२८. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सत्तलिपुप्फपूजको थेरो इमा गाथायो अभासित्थाति.

सत्तलिपुप्फपूजकत्थेरस्सापदानं अट्ठमं.