१. तुवरदायकत्थेरअपदानं

१. ‘‘मिगलुद्दो पुरे आसिं, अरञ्ञे कानने अहं;

भरित्वा तुवरमादाय [भरित्वा तुरवमादाय (क.), भज्जितं तुवरमादाय (?) एत्थ तुवरन्ति मुग्गकलायसदिसं तुवरट्ठिन्ति तदट्ठकथा; तुवरो धञ्ञभेदेति सक्कताभिधाने], सङ्घस्स अददिं अहं.

२. ‘‘एकनवुतितो कप्पे, यं दानमददिं तदा;

दुग्गतिं नाभिजानामि, तुवरस्स इदं फलं.

३. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा तुवरदायको थेरो इमा गाथायो अभासित्थाति.

तुवरदायकत्थेरस्सापदानं पठमं.