५. वेदिकारकत्थेरअपदानं

१९. ‘‘विपस्सिनो भगवतो, बोधिया पादपुत्तमे;

पसन्नचित्तो सुमनो, कारेसिं वेदिकं अहं.

२०. ‘‘एकनवुतितो कप्पे, कारेसिं वेदिकं अहं;

दुग्गतिं नाभिजानामि, वेदिकाय इदं फलं.

२१. ‘‘इतो एकादसे कप्पे, अहोसिं सूरियस्समो;

सत्तरत्तनसम्पन्नो, चक्कवत्ती महब्बलो.

२२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा वेदिकारको थेरो इमा गाथायो अभासित्थाति.

वेदिकारकत्थेरस्सापदानं पञ्चमं.