४. एकसञ्ञकत्थेरअपदानं

१७. ‘‘दुमग्गे पंसुकूलिकं [पंसुकूलकं (?)], लग्गं दिस्वान सत्थुनो;

अञ्जलिं पग्गहेत्वान, पंसुकूलं अवन्दहं.

१८. ‘‘एकत्तिंसे इतो कप्पे, यं सञ्ञमलभिं तदा;

दुग्गतिं नाभिजानामि, बुद्धपूजायिदं फलं.

१९. ‘‘पञ्चवीसे इतो कप्पे, एको आसिं जनाधिपो;

अमिताभोति नामेन, चक्कवत्ती महब्बलो.

२०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा एकसञ्ञको थेरो इमा गाथायो अभासित्थाति.

एकसञ्ञकत्थेरस्सापदानं चतुत्थं.