१. हत्थिदायकत्थेरअपदानं

१. ‘‘सिद्धत्थस्स भगवतो, द्विपदिन्दस्स तादिनो;

नागसेट्ठो मया दिन्नो, ईसादन्तो उरूळ्हवा.

२. ‘‘उत्तमत्थं अनुभोमि, सन्तिपदमनुत्तरं;

नागदानं [अग्गदानं (सी. क.)] मया दिन्नं, सब्बलोकहितेसिनो.

३. ‘‘चतुन्नवुतितो कप्पे, यं नाग [दान (सी. क.)] मददिं तदा;

दुग्गतिं नाभिजानामि, नागदानस्सिदं फलं.

४. ‘‘अट्ठसत्ततिकप्पम्हि, सोळसासिंसु खत्तिया;

समन्तपासादिका नाम, चक्कवत्ती महब्बला.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा हत्थिदायको थेरो इमा गाथायो अभासित्थाति.

हत्थिदायकत्थेरस्सापदानं पठमं.