८. मुट्ठिपूजकत्थेरअपदानं

४२. ‘‘सुमेधो नाम भगवा, लोकजेट्ठो नरासभो;

पच्छिमे अनुकम्पाय, पधानं पदही जिनो.

४३. ‘‘तस्स चङ्कममानस्स, द्विपदिन्दस्स तादिनो;

गिरिनेलस्स पुप्फानं, मुट्ठिं बुद्धस्स रोपयिं.

४४. ‘‘तेन चित्तप्पसादेन, सुक्कमूलेन चोदितो;

तिंसकप्पसहस्सानि, दुग्गतिं नुपपज्जहं.

४५. ‘‘तेवीसतिकप्पसते, सुनेलो नाम खत्तियो;

सत्तरतनसम्पन्नो, एको आसिं महब्बलो.

४६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मुट्ठिपूजको थेरो इमा गाथायो अभासित्थाति.

मुट्ठिपूजकत्थेरस्सापदानं अट्ठमं.