९. किंकणिकपुप्फियत्थेरअपदानं

४७. ‘‘सुमङ्गलोति नामेन, सयम्भू अपराजितो;

पवना निक्खमित्वान, नगरं पाविसी जिनो.

४८. ‘‘पिण्डचारं चरित्वान, निक्खम्म नगरा मुनि;

कतकिच्चोव सम्बुद्धो, सो वसी वनमन्तरे.

४९. ‘‘किंकणिपुप्फं पग्गय्ह, बुद्धस्स अभिरोपयिं;

पसन्नचित्तो सुमनो, सयम्भुस्स महेसिनो.

५०. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

५१. ‘‘छळासीतिम्हितो कप्पे, अपिलासिसनामको;

सत्तरतनसम्पन्नो, चक्कवत्ती महब्बलो.

५२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा किंकणिकपुप्फियो थेरो इमा गाथायो अभासित्थाति.

किंकणिकपुप्फियत्थेरस्सापदानं नवमं.