४. असोकपूजकत्थेरअपदानं

१७. ‘‘तिवरायं [तिपुरायं (स्या.)] पुरे रम्मे, राजुय्यानं अहु तदा;

उय्यानपालो तत्थासिं, रञ्ञो बद्धचरो अहं.

१८. ‘‘पदुमो नाम नामेन, सयम्भू सप्पभो अहु;

निसिन्नं [निसिन्नो (क.)] पुण्डरीकम्हि, छाया न जहि तं मुनिं.

१९. ‘‘असोकं पुप्फितं दिस्वा, पिण्डिभारं सुदस्सनं;

बुद्धस्स अभिरोपेसिं, जलजुत्तमनामिनो.

२०. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

२१. ‘‘सत्ततिंसम्हितो कप्पे, सोळस अरणञ्जहा [अरुणञ्जहा (सी.)];

सत्तरतनसम्पन्ना, चक्कवत्ती महब्बला.

२२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा असोकपूजको थेरो इमा गाथायो अभासित्थाति.

असोकपूजकत्थेरस्सापदानं चतुत्थं.