५. अङ्कोलकत्थेरअपदानं

२३. ‘‘अङ्कोलं पुप्फितं दिस्वा, मालावरं सकोसकं [समोगधं (स्या.)];

ओचिनित्वान तं पुप्फं, अगमं बुद्धसन्तिकं.

२४. ‘‘सिद्धत्थो तम्हि समये, पतिलीनो महामुनि;

मुहुत्तं पटिमानेत्वा, गुहायं पुप्फमोकिरिं.

२५. ‘‘चतुन्नवुतितो कप्पे, यं पुप्फमभिपूजयिं;

दुग्गतिं नाभिजानामि, पुप्फदानस्सिदं [बुद्धपूजायिदं (सी. स्या.)] फलं.

२६. ‘‘छत्तिंसम्हि इतो कप्पे, आसेको देवगज्जितो;

सत्तरतनसम्पन्नो, चक्कवत्ती महब्बलो.

२७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अङ्कोलको थेरो इमा गाथायो अभासित्थाति.

अङ्कोलकत्थेरस्सापदानं पञ्चमं.