१. तमालपुप्फियत्थेरअपदानं

१. ‘‘चुल्लासीतिसहस्सानि, थम्भा सोवण्णया अहू;

देवलट्ठिपटिभागं, विमानं मे सुनिम्मितं.

२. ‘‘तमालपुप्फं पग्गय्ह, विप्पसन्नेन चेतसा;

बुद्धस्स अभिरोपयिं, सिखिनो लोकबन्धुनो.

३. ‘‘एकत्तिंसे इतो कप्पे, यं कम्ममकरिं तदा;

दुग्गतिं नाभिजानामि, बुद्धपूजायिदं फलं.

४. ‘‘इतो वीसतिमे कप्पे, चन्दतित्तोति एकको;

सत्तरतनसम्पन्नो, चक्कवत्ती महब्बलो.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा तमालपुप्फियो थेरो इमा गाथायो अभासित्थाति.

तमालपुप्फियत्थेरस्सापदानं पठमं.