८. मिञ्जवटंसकियत्थेरअपदानं

३९. ‘‘निब्बुते लोकनाथम्हि, सिखिम्हि वदतं वरे;

वटंसकेहि आकिण्णं, बोधिपूजं अकासहं.

४०. ‘‘एकत्तिंसे इतो कप्पे, यं पूजमकरिं तदा;

दुग्गतिं नाभिजानामि, बोधिपूजायिदं फलं.

४१. ‘‘इतो छब्बीसतिकप्पे, अहुं मेघब्भनामको;

सत्तरतनसम्पन्नो, चक्कवत्ती महब्बलो.

४२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा मिञ्जवटंसकियो थेरो इमा गाथायो अभासित्थाति.

मिञ्जवटंसकियत्थेरस्सापदानं अट्ठमं.