९. सुकतावेळियत्थेरअपदानं

४३. ‘‘असितो नाम नामेन, मालाकारो अहं [अहुं (?)] तदा;

आवेळं पग्गहेत्वान, रञ्ञो दातुं वजामहं.

४४. ‘‘असम्पत्तोम्हि [असम्पत्तम्हि (सी.), असम्पत्तोव (?)] राजानं, अद्दसं सिखिनायकं;

हट्ठो हट्ठेन चित्तेन, बुद्धस्स अभिरोपयिं.

४५. ‘‘एकत्तिंसे इतो कप्पे, यं पुप्फमभिपूजयिं;

दुग्गतिं नाभिजानामि, बुद्धपूजायिदं फलं.

४६. ‘‘पञ्चवीसे इतो कप्पे, राजाहोसिं महब्बलो;

वेभारो नाम नामेन, चक्कवत्ती महब्बलो.

४७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा सुकतावेळियो थेरो इमा गाथायो अभासित्थाति.

सुकतावेळियत्थेरस्सापदानं नवमं.