४. आरक्खदायकत्थेरअपदानं

१९. ‘‘सिद्धत्थस्स भगवतो, वेदि कारापिता [वेदिका कारिता (स्या.)] मया;

आरक्खो च मया दिन्नो, सुगतस्स महेसिनो.

२०. ‘‘तेन कम्मविसेसेन, न पस्सिं भयभेरवं;

कुहिञ्चि उपपन्नस्स, तासो मय्हं न विज्जति.

२१. ‘‘चतुन्नवुतितो कप्पे, यं वेदिं कारयिं पुरे;

दुग्गतिं नाभिजानामि, वेदिकाय इदं फलं.

२२. ‘‘इतो छट्ठम्हि कप्पम्हि, अपस्सेनसनामको;

सत्तरतनसम्पन्नो, चक्कवत्ती महब्बलो.

२३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा आरक्खदायको थेरो इमा गाथायो अभासित्थाति.

आरक्खदायकत्थेरस्सापदानं चतुत्थं.