५. अब्याधिकत्थेरअपदानं

२४. ‘‘विपस्सिस्स भगवतो, अग्गिसालं अदासहं;

ब्याधिकानञ्च आवासं, उण्होदकपटिग्गहं.

२५. ‘‘तेन कम्मेनयं मय्हं, अत्तभावो सुनिम्मितो;

ब्याधाहं नाभिजानामि, पुञ्ञकम्मस्सिदं फलं.

२६. ‘‘एकनवुतितो कप्पे, यं सालमददिं तदा;

दुग्गतिं नाभिजानामि, अग्गिसालायिदं फलं.

२७. ‘‘इतो च सत्तमे कप्पे, एकोसिं अपराजितो [एको आसिं नराधिपो (स्या.)];

सत्तरतनसम्पन्नो, चक्कवत्ती महब्बलो.

२८. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अब्याधिको थेरो इमा गाथायो अभासित्थाति.

अब्याधिकत्थेरस्सापदानं पञ्चमं.