२. अजिनदायकत्थेरअपदानं

६. ‘‘एकत्तिंसे इतो कप्पे, गणसत्थारको अहं;

अद्दसं विरजं बुद्धं, आहुतीनं पटिग्गहं.

७. ‘‘चम्मखण्डं मया दिन्नं, सिखिनो लोकबन्धुनो;

तेन कम्मेन द्विपदिन्द, लोकजेट्ठ नरासभ.

८. ‘‘सम्पत्तिं अनुभोत्वान, किलेसे झापयिं अहं;

धारेमि अन्तिमं देहं, सम्मासम्बुद्धसासने.

९. ‘‘एकत्तिंसे इतो कप्पे, अजिनं यं अदासहं;

दुग्गतिं नाभिजानामि, अजिनस्स इदं फलं.

१०. ‘‘इतो पञ्चमके कप्पे, राजा आसिं सुदायको;

सत्तरतनसम्पन्नो, चक्कवत्ती महब्बलो.

११. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा अजिनदायको थेरो इमा गाथायो अभासित्थाति.

अजिनदायकत्थेरस्सापदानं दुतियं.