२. बन्धुजीवकत्थेरअपदानं

६. ‘‘सिद्धत्थो नाम सम्बुद्धो, सयम्भू सब्भि वण्णितो;

समाधिं सो समापन्नो, निसीदि पब्बतन्तरे.

७. ‘‘जातस्सरे गवेसन्तो, दकजं पुप्फमुत्तमं;

बन्धुजीवकपुप्फानि, अद्दसं समनन्तरं.

८. ‘‘उभो हत्थेहि पग्गय्ह, उपागच्छिं महामुनिं;

पसन्नचित्तो सुमनो, सिद्धत्थस्साभिरोपयिं.

९. ‘‘चतुन्नवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

१०. ‘‘इतो चातुद्दसे कप्पे, एको आसिं जनाधिपो;

समुद्दकप्पो नामेन, चक्कवत्ती महब्बलो.

११. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा बन्धुजीवको थेरो इमा गाथायो अभासित्थाति.

बन्धुजीवकत्थेरस्सापदानं दुतियं.