३. कोटुम्बरियत्थेरअपदानं

१२. ‘‘कणिकारंव जोतन्तं, निसिन्नं पब्बतन्तरे;

अप्पमेय्यंव उदधिं, वित्थतं धरणिं यथा.

१३. ‘‘पूजितं [परेतं (सी.)] देवसङ्घेन, निसभाजानियं यथा;

हट्ठो हट्ठेन चित्तेन, उपागच्छिं नरुत्तमं.

१४. ‘‘सत्तपुप्फानि पग्गय्ह, कोटुम्बरसमाकुलं;

बुद्धस्स अभिरोपेसिं, सिखिनो लोकबन्धुनो.

१५. ‘‘एकत्तिंसे इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

१६. ‘‘इतो वीसतिकप्पम्हि, महानेलसनामको;

एको आसि महातेजो, चक्कवत्ती महब्बलो.

१७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा कोटुम्बरियो थेरो इमा गाथायो अभासित्थाति.

कोटुम्बरियत्थेरस्सापदानं ततियं.