१. कुटजपुप्फियत्थेरअपदानं

१. ‘‘सुवण्णवण्णं सम्बुद्धं, सतरंसिंव उग्गतं;

दिसं अनुविलोकेन्तं, गच्छन्तं अनिलञ्जसे.

२. ‘‘कुटजं पुप्फितं दिस्वा, संवित्थतसमोत्थतं;

रुक्खतो ओचिनित्वान, फुस्सस्स अभिरोपयिं.

३. ‘‘द्वेनवुते इतो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

४. ‘‘इतो सत्तरसे कप्पे, तयो आसुं सुपुप्फिता;

सत्तरतनसम्पन्ना, चक्कवत्ती महब्बला.

५. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं आयस्मा कुटजपुप्फियो थेरो इमा गाथायो अभासित्थाति.

कुटजपुप्फियत्थेरस्सापदानं पठमं.