२. निस्सेणिदायकत्थेरअपदानं

९. ‘‘कोण्डञ्ञस्स भगवतो, लोकजेट्ठस्स तादिनो;

आरोहत्थाय पासादं, निस्सेणी कारिता मया.

१०. ‘‘तेन चित्तप्पसादेन, अनुभोत्वान सम्पदा;

धारेमि अन्तिमं देहं, सम्मासम्बुद्धसासने.

११. ‘‘एकत्तिंसम्हि कप्पानं, सहस्सम्हि तयो अहुं [महा (सी. स्या.)];

सम्बहुला नाम राजानो, चक्कवत्ती महब्बला.

१२. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा निस्सेणिदायको थेरो इमा गाथायो अभासित्थाति.

निस्सेणिदायकत्थेरस्सापदानं दुतियं.