३. रत्तिपुप्फियत्थेरअपदानं

१३. ‘‘मिगलुद्दो पुरे आसिं, अरञ्ञे कानने अहं;

विपस्सिं अद्दसं बुद्धं, देवदेवं नरासभं.

१४. ‘‘रत्तिकं पुप्फितं दिस्वा, कुटजं धरणीरुहं;

समूलं पग्गहेत्वान, उपनेसिं महेसिनो.

१५. ‘‘एकनवुतितो कप्पे, यं पुप्फमभिरोपयिं;

दुग्गतिं नाभिजानामि, पुप्फदानस्सिदं फलं.

१६. ‘‘इतो च अट्ठमे कप्पे, सुप्पसन्नसनामको;

सत्तरतनसम्पन्नो, राजाहोसिं महब्बलो.

१७. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा रत्तिपुप्फियो थेरो इमा गाथायो अभासित्थाति.

रत्तिपुप्फियत्थेरस्सापदानं ततियं.