८. दुस्सदायकत्थेरअपदानं

३८. ‘‘तिवरायं पुरे रम्मे, राजपुत्तोसहं [राजपुत्तो अहं (सी. स्या.)] तदा;

पण्णाकारं लभित्वान, उपसन्तस्सदासहं.

३९. ‘‘अधिवासेसि भगवा, वत्थं [नवं (क.)] हत्थेन आमसि;

सिद्धत्थो अधिवासेत्वा, वेहासं नभमुग्गमि.

४०. ‘‘बुद्धस्स गच्छमानस्स, दुस्सा धावन्ति पच्छतो;

तत्थ चित्तं पसादेसिं, बुद्धो नो अग्गपुग्गलो.

४१. ‘‘चतुन्नवुतितो कप्पे, यं दुस्समददिं तदा;

दुग्गतिं नाभिजानामि, दुस्सदानस्सिदं फलं.

४२. ‘‘सत्तसट्ठिम्हितो कप्पे, चक्कवत्ती तदा अहु;

परिसुद्धोति नामेन, मनुजिन्दो महब्बलो.

४३. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा दुस्सदायको थेरो इमा गाथायो अभासित्थाति.

दुस्सदायकत्थेरस्सापदानं अट्ठमं.