९. गण्ठिपुप्फियत्थेरअपदानं

९१. ‘‘सुवण्णवण्णो सम्बुद्धो, विपस्सी दक्खिणारहो;

पुरक्खतो सावकेहि, आरामा अभिनिक्खमि.

९२. ‘‘दिस्वानहं बुद्धसेट्ठं, सब्बञ्ञुं तमनासकं;

पसन्नचित्तो सुमनो, गण्ठिपुप्फं [गतमग्गं (स्या. क.)] अपूजयिं.

९३. ‘‘तेन चित्तप्पसादेन, द्विपदिन्दस्स तादिनो;

हट्ठो हट्ठेन चित्तेन, पुन वन्दिं तथागतं.

९४. ‘‘एकनवुतितो कप्पे, यं पुप्फमभिरोपयिं;

दुग्गतिं नाभिजानामि, बुद्धपूजायिदं फलं.

९५. ‘‘एकतालीसितो कप्पे, चरणो नाम खत्तियो;

सत्तरतनसम्पन्नो, चक्कवत्ती महब्बलो.

९६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं आयस्मा गण्ठिपुप्फियो [गन्धपुप्फियो (स्या. क.)] थेरो इमा गाथायो अभासित्थाति.

गण्ठिपुप्फियत्थेरस्सापदानं नवमं.