३. ततियसिक्खापदवण्णना

१०७७. ततिये – सिक्खासम्मुतिं दातुन्ति कस्मा दापेसि? ‘‘मातुगामो नाम लोलो होति द्वे वस्सानि छसु धम्मेसु असिक्खित्वा सीलानि पूरयमानो किलमति, सिक्खित्वा पन पच्छा न किलमिस्सति, नित्थरिस्सती’’ति दापेसि.

१०७९. पाणातिपाता वेरमणिं द्वे वस्सानि अवीतिक्कम्म समादानं समादियामीति यं तं पाणातिपाता वेरमणीति पञ्ञत्तं सिक्खापदं, तं पाणातिपाता वेरमणिसिक्खापदं द्वे वस्सानि अवीतिक्कमितब्बसमादानं कत्वा समादियामीति अत्थो. एस नयो सब्बत्थ. इमा छ सिक्खायो सट्ठिवस्सायपि पब्बजिताय दातब्बायेव, न एतासु असिक्खिता उपसम्पादेतब्बा.

ततियसिक्खापदं.