३. ततियसिक्खापदवण्णना

९४१. ततिये – उळारसम्भाविताति उळारकुला पब्बजितत्ता गुणेहि च उळारत्ता उळाराति सम्भाविता. इस्सापकताति इस्साय अपकता; अभिभूताति अत्थो. सञ्ञत्ति बहुला एतासन्ति सञ्ञत्तिबहुला; दिवसं महाजनं सञ्ञापयमानाति अत्थो. विञ्ञत्ति बहुला एतासन्ति विञ्ञत्तिबहुला. विञ्ञत्तीति हेतूदाहरणादीहि विविधेहि नयेहि ञापना वेदितब्बा, न याचना.

९४३. चङ्कमने निवत्तनगणनाय आपत्तियो वेदितब्बा. तिट्ठति वातिआदीसु पयोगगणनाय. उद्दिसति वातिआदीसु पदादिगणनाय. सेसं उत्तानमेव.

तिसमुट्ठानं – किरियाकिरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, दुक्खवेदनन्ति.

ततियसिक्खापदं.