१०. दसमसिक्खापदवण्णना

९७३. दसमे – आहुन्दरिकाति सम्बाधा.

९७५. धुरं निक्खित्तमत्तेति सचेपि धुरं निक्खिपित्वा पच्छा पक्कमति, आपत्तियेवाति अत्थो. पवारेत्वा पञ्च योजनानि गच्छन्तियापि अनापत्ति. छसु वत्तब्बमेव नत्थि. सचे पन तीणि गन्त्वा तेनेव मग्गेन पच्चागच्छति, न वट्टति. अञ्ञेन मग्गेन आगन्तुं वट्टति.

९७६. अन्तरायेति दसविधे अन्तराये – परं गच्छिस्सामीति निक्खन्ता, नदीपूरो पन आगतो, चोरा वा मग्गे होन्ति, मेघो वा उट्ठाति, निवत्तितुं वट्टति. सेसं उत्तानमेव. पठमपाराजिकसमुट्ठानं – अकिरियं, सञ्ञाविमोक्खं, सचित्तकं, लोकवज्जं, कायकम्मं, अकुसलचित्तं, दुक्खवेदनन्ति.

दसमसिक्खापदं.

तुवट्टवग्गो चतुत्थो.