१. पठमसिक्खापदवण्णना

८३९. अन्धकारवग्गस्स पठमसिक्खापदे – अप्पदीपेति पदीपचन्दसूरियअग्गीसु एकेनापि अनोभासिते. तेनेवस्स पदभाजने ‘‘अनालोके’’ति वुत्तं. सल्लपेय्य वाति गेहस्सितकथं कथेय्य.

८४१. अरहोपेक्खा अञ्ञविहिताति न रहोअस्सादापेक्खा रहोअस्सादतो अञ्ञविहिताव हुत्वा ञातिं वा पुच्छति, दाने वा पूजाय वा मन्तेति. सेसं उत्तानमेव. थेय्यसत्थसमुट्ठानं – कायचित्ततो कायवाचाचित्ततो च समुट्ठाति, किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, द्विवेदनन्ति.

पठमसिक्खापदं.