६. छट्ठसङ्घादिसेससिक्खापदवण्णना

७०५-६. छट्ठे – यतो त्वन्ति यस्मा त्वं. उय्योजेति आपत्ति दुक्कटस्सातिआदिका सङ्घादिसेसपरियोसाना आपत्तियो कस्सा होन्तीति? उय्योजिकाय. वुत्तञ्चेतं परिवारेपि –

‘‘न देति न पटिग्गण्हाति, पटिग्गहो तेन न विज्जति;

आपज्जति गरुकं न लहुकं, तञ्च परिभोगपच्चया;

पञ्हा मेसा कुसलेहि चिन्तिता’’ति. (परि. ४८१);

अयञ्हि गाथा इमं उय्योजिकं सन्धाय वुत्ता. इतरिस्सा पन आपत्तिभेदो पठमसिक्खापदे विभत्तोति. सेसं उत्तानमेव.

तिसमुट्ठानं – किरियं, सञ्ञाविमोक्खं, सचित्तकं, लोकवज्जं, कायकम्मं, वचीकम्मं, अकुसलचित्तं, तिवेदनन्ति.

छट्ठसिक्खापदं.