५. कबळवग्गवण्णना

६१७. अनाहटेति अनाहरिते; मुखद्वारं असम्पापितेति अत्थो.

६१८. सब्बं हत्थन्ति सकलहत्थं.

६१९. सकबळेनाति एत्थ धम्मं कथेन्तो हरीतकं वा लट्ठिमधुकं वा मुखे पक्खिपित्वा कथेति. यत्तकेन वचनं अपरिपुण्णं न होति, तत्तके मुखम्हि सन्ते कथेतुं वट्टति.

६२०. पिण्डुक्खेपकन्ति पिण्डं उक्खिपित्वा उक्खिपित्वा.

६२१. कबळावच्छेदकन्ति कबळं अवच्छिन्दित्वा अवच्छिन्दित्वा.

६२२. अवगण्डकारकन्ति मक्कटो विय गण्डे कत्वा कत्वा.

६२३. हत्थनिद्धुनकन्ति हत्थं निद्धुनित्वा निद्धुनित्वा.

६२४. सित्थावकारकन्ति सित्थानि अवकिरित्वा अवकिरित्वा.

६२५. जिव्हानिच्छारकन्ति जिव्हं निच्छारेत्वा निच्छारेत्वा.

६२६. चपुचपुकारकन्ति चपु चपूति एवं सद्दं कत्वा कत्वा.

पञ्चमो वग्गो.