२. दुतियपाटिदेसनीयसिक्खापदवण्णना

५५८. दुतिये – अपसक्क ताव भगिनीतिआदि अपसादेतब्बाकारदस्सनं.

५६१. अत्तनो भत्तं दापेति न देतीति एत्थ सचेपि अत्तनो भत्तं देति, इमिना सिक्खापदेन अनापत्तियेव, पुरिमसिक्खापदेन आपत्ति. अञ्ञेसं भत्तं देति न दापेतीति एत्थ सचेपि दापेय्य, इमिना सिक्खापदेन आपत्ति भवेय्य. देन्तिया पन नेव इमिना न पुरिमेन आपत्ति. सेसमेत्थ उत्तानमेव. कथिनसमुट्ठानं – किरियाकिरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति.

दुतियपाटिदेसनीयं.