३. साकेतसुत्तवण्णना

५१३. ततिये अञ्जनवनेति अञ्जनवण्णपुप्फानं रुक्खानं रोपितवने. यं, भिक्खवे, सद्धिन्द्रियं, तं सद्धाबलन्ति तञ्हि अधिमोक्खलक्खणे इन्दट्ठेन सद्धिन्द्रियं, अस्सद्धिये अकम्पनेन सद्धाबलं. इतरेसं पग्गहउपट्ठानअविक्खेपपजाननलक्खणेसु इन्दट्ठेन इन्द्रियभावो, कोसज्जमुट्ठसच्चविक्खेपाविज्जासु अकम्पनेन बलभावो वेदितब्बो. एवमेव खोति तस्सा नदिया एकसोतं विय सद्धावीरियसतिसमाधिपञ्ञावसेन एतेसं निन्नानाकरणं वेदितब्बं, द्वे सोतानि विय इन्दट्ठअकम्पनट्ठेहि इन्द्रियबलवसेन नानाकरणं वेदितब्बं.