८. सूदसुत्तवण्णना

३७४. अट्ठमे सूदोति भत्तकारको. नानच्चयेहीति नानाचयेहि, नानाविधेहीति अत्थो. अयमेव वा पाठो. अम्बिलग्गेहीति अम्बिलकोट्ठासेहि. एसेव नयो सब्बत्थ. अभिहरतीति गहणत्थाय हत्थं पसारेति. बहुं गण्हातीति एकग्गहणेन बहुं गण्हन्तोपि पुनप्पुनं गण्हन्तोपि बहुं गण्हतेव. अभिहारानन्ति सतं वा सहस्सं वा उक्खिपित्वा अभिहटानं दायानं. उपक्किलेसाति पञ्च नीवरणा. निमित्तं न उग्गण्हातीति ‘‘इमं मे कम्मट्ठानं अनुलोमं वा गोत्रभुं वा आहच्च ठित’’न्ति न जानाति, अत्तनो चित्तस्स निमित्तं गण्हितुं न सक्कोति. इमस्मिं सुत्ते पुब्बभागविपस्सना सतिपट्ठानाव कथिता.