४. पुञ्ञाभिसन्दवग्गो

१. पठमपुञ्ञाभिसन्दसुत्तवण्णना

१०२७. चतुत्थस्स पठमे पुञ्ञाभिसन्दा कुसलाभिसन्दाति पुञ्ञनदियो कुसलनदियो. सुखस्साहाराति सुखस्स पच्चया.

४. पठमदेवपदसुत्तवण्णना

१०३०. चतुत्थे देवपदानीति देवानं ञाणेन, देवस्स वा ञाणेन अक्कन्तपदानि. विसुद्धियाति विसुज्झनत्थाय. परियोदपनायाति पुरियोदपनत्थाय जोतनत्थाय. इमस्मिं सुत्ते चत्तारोपि फलट्ठपुग्गला विसुद्धट्ठेन देवा नाम जाता.

८. वस्ससुत्तवण्णना

१०३४. अट्ठमे पारंगन्त्वाति पारं वुच्चति निब्बानं, तं पत्वाति अत्थो. आसवानं खयाय संवत्तन्तीति न पठमं निब्बानं गन्त्वा पच्छा संवत्तन्ति, गच्छमाना एव संवत्तन्ति. देसना पन एवं कता.

१०. नन्दियसक्कसुत्तवण्णना

१०३६. दसमे दिवा पविवेकाय रत्तिं पटिसल्लानायाति दिवा पविवेकत्थाय रत्तिं पटिसल्लानत्थाय. धम्मा न पातुभवन्तीति समथविपस्सना धम्मा न उप्पज्जन्ति. सेसं सब्बत्थ उत्तानमेवाति.

पुञ्ञाभिसन्दवग्गो चतुत्थो.