७. दुतियमित्तामच्चसुत्तवण्णना

१०१३. सत्तमे अञ्ञथत्तं नाम पसादञ्ञथत्तं भावञ्ञथत्तं गतिअञ्ञथत्तं लक्खणञ्ञथत्तं विपरिणामञ्ञथत्तन्ति अनेकविधं. तत्थ महाभूतेसु भावञ्ञथत्तं अधिप्पेतं. सुवण्णादिभावेन हि घनसण्ठिताय पथविधातुया विलीयित्वा उदकभावं आपज्जमानाय पुरिमभावो विगच्छति, भावञ्ञथत्तं पञ्ञायति. लक्खणं पन न विगच्छति, कक्खळलक्खणाव होति. उच्छुरसादिभावेन च यूसाकारसण्ठिताय आपोधातुया सुस्सित्वा घनपथविभावं आपज्जमानाय पुरिमभावो विगच्छति, भावञ्ञथत्तं पञ्ञायति. लक्खणं पन न विगच्छति, आबन्धनलक्खणाव होति. तत्रिदं अञ्ञथत्तन्ति एत्थ पन गतिअञ्ञथत्तं अधिप्पेतं, तञ्हि अरियसावकस्स नत्थि. पसादञ्ञथत्तम्पि नत्थियेव, इध पन पसादफलं पकासेतुं गतिअञ्ञथत्तमेव दस्सितं. सेसं सब्बत्थ उत्तानमेवाति.

राजकारामवग्गो दुतियो.