१. संयोजनसुत्तवण्णना

३४३. चित्तसंयुत्तस्स पठमे मच्छिकासण्डेति एवंनामके वनसण्डे. अयमन्तराकथा उदपादीति पोराणकत्थेरा अतिरच्छानकथा होन्ति, निसिन्ननिसिन्नट्ठाने पञ्हं समुट्ठापेत्वा अजानन्ता पुच्छन्ति, जानन्ता विस्सज्जेन्ति, तेन नेसं अयं कथा उदपादि. मिगपथकन्ति एवंनामकं अत्तनो भोगगामं. सो किर अम्बाटकारामस्स पिट्ठिभागे होति. तेनुपसङ्कमीति ‘‘थेरानं पञ्हं विस्सज्जेत्वा फासुविहारं कत्वा दस्सामी’’ति चिन्तेत्वा उपसङ्कमि. गम्भीरे बुद्धवचनेति अत्थगम्भीरे चेव धम्मगम्भीरे च बुद्धवचने. पञ्ञाचक्खु कमतीति ञाणचक्खु वहति पवत्तति.