४. अगारसुत्तवण्णना

२६२. चतुत्थे पुरत्थिमाति पुरत्थिमाय. एवं सब्बत्थ. सामिसापि सुखा वेदनातिआदीसु सामिसा सुखा नाम कामामिसपटिसंयुत्ता वेदना. निरामिसा सुखा नाम पठमज्झानादिवसेन विपस्सनावसेन अनुस्सतिवसेन च उप्पन्ना वेदना. सामिसा दुक्खा नाम कामामिसेनेव सामिसा वेदना, निरामिसा दुक्खा नाम अनुत्तरेसु विमोक्खेसु पिहं उपट्ठापयतो पिहपच्चया उप्पन्नदोमनस्सवेदना. सामिसा अदुक्खमसुखा नाम कामामिसेनेव सामिसा वेदना. निरामिसा अदुक्खमसुखा नाम चतुत्थज्झानवसेन उप्पन्ना अदुक्खमसुखा वेदना.