१. वातसुत्तवण्णना

२०६. दिट्ठिसंयुत्ते न वाता वायन्तीतिआदीसु एवं किर तेसं दिट्ठि – ‘‘येपि एते रुक्खसाखादीनि भञ्जन्ता वाता वायन्ति, न एते वाता, वातलेसो नामेसो, वातो पन एसिकत्थम्भो विय पब्बतकूटं विय च ठितो. तथा यापि एता तिणकट्ठादीनि वहन्तियो नदियो सन्दन्ति, न एत्थ उदकं सन्दकि, उदकलेसो नामेस, उदकं पन एसिकत्थम्भो विय पब्बतकूटं विय च ठितं. यापिमा गब्भिनियो विजायन्तीति च वुच्चन्ति, किञ्चापि ता मिलातुदरा होन्ति, गब्भो पन न निक्खमति, गब्भलेसो नामेसो, गब्भो पन एसिकत्थम्भो विय पब्बतकूटं विय च ठितो. येपि एते चन्दिमसूरिया उदेन्ति वा अपेन्ति वा, नेव ते उदेन्ति न अपेन्ति, चन्दिमसूरियलेसो नामेस, चन्दिमसूरिया पन एसिकत्थम्भो विय पब्बतकूटं विय च ठिता’’ति.