२-४. एतंममसुत्तादिवण्णना

२०७-२०९. दिट्ठन्तिआदीसु दिट्ठं रूपायतनं. सुतं सद्दायतनं. मुतं गन्धायतनं रसायतनं फोट्ठब्बायतनं. तञ्हि पत्वा गहेतब्बतो मुतन्ति च वुत्तं. अवसेसानि सत्तायतनानि विञ्ञातं नाम. पत्तन्ति परियेसित्वा वा अपरियेसित्वा वा पत्तं. परियेसितन्ति पत्तं वा अपत्तं वा परियेसितं. अनुविचरितं मनसाति चित्तेन अनुसञ्चरितं. लोकस्मिञ्हि परियेसित्वा पत्तम्पि अत्थि, परियेसित्वा नोपत्तम्पि, अपरियेसित्वा पत्तम्पि, अपरियेसित्वा नोपत्तम्पि. तत्थ परियेसित्वा पत्तं पत्तं नाम, परियेसित्वा नोपत्तं परियेसितं नाम. अपरियेसित्वा पत्तञ्च अपरियेसित्वा नोपत्तञ्च मनसानुविचरितं नाम. अथ वा परियेसित्वा पत्तम्पि अपरियेसित्वा पत्तम्पि पत्तट्ठेन पत्तं नाम, परियेसित्वा नोपत्तमेव परियेसितं नाम, अपरियेसित्वा नोपत्तं मनसानुविचरितं नाम. सब्बं वा एतं मनसा अनुविचरितमेव.