३. कुलसुत्तवण्णना

२२५. ततिये सुप्पधंसियानीति सुविहेठियानि. कुम्भत्थेनकेहीति ये परघरं पविसित्वा दीपालोकेन ओलोकेत्वा परभण्डं हरितुकामा घटे दीपं कत्वा पविसन्ति, ते कुम्भत्थेनका नाम, तेहि कुम्भत्थेनकेहि. सुप्पधंसियो होति अमनुस्सेहीति मेत्ताभावनारहितं पंसुपिसाचका विधंसयन्ति, पगेव उळारा अमनुस्सा. भाविताति वड्ढिता. बहुलीकताति पुनप्पुनं कता. यानीकताति युत्तयानं विय कता. वत्थुकताति पतिट्ठानट्ठेन वत्थु विय कता. अनुट्ठिताति अधिट्ठिता. परिचिताति समन्ततो चिता सुवड्ढिता. सुसमारद्धाति चित्तेन सुट्ठु समारद्धा. ततियं.