५. अचिरपक्कन्तसुत्तवण्णना

१८४. पञ्चमे पराभवायाति अवड्ढिया विनासाय. अस्सतरीति वळवाय कुच्छिस्मिं गद्रभस्स जाता. अत्तवधाय गब्भं गण्हातीति तं अस्सेन सद्धिं सम्पयोजेन्ति, सा गब्भं गण्हित्वा काले सम्पत्ते विजायितुं न सक्कोति, पादेहि भूमियं पहरन्ती तिट्ठति, अथस्सा चत्तारो पादे चतूसु खाणुकेसु बन्धित्वा कुच्छिं फालेत्वा पोतं नीहरन्ति, सा तत्थेव मरति. तेनेतं वुत्तं. पञ्चमं.