२. दुतियवग्गो

१-२. सुवण्णपातिसुत्तादिवण्णना

१६७-१६८. दुतियवग्गस्स पठमे सम्पजानमुसा भासन्तन्ति अप्पमत्तकेनपि कारणेन सम्पजानमेव मुसा भासन्तं. ‘‘सीलं पूरेस्सामी’’ति संविहितभिक्खुं सिनेरुमत्तोपि पच्चयरासि चालेतुं न सक्कोति. यदा पन सीलं पहाय सक्कारनिस्सितो होति, तदा कुण्डकमुट्ठिहेतुपि मुसा भासति, अञ्ञं वा अकिच्चं करोति. दुतियं उत्तानमेवाति. पठमदुतियानि.

३-१०. सुवण्णनिक्खसुत्तादिवण्णना

१६९. ततियादीसु सुवण्णनिक्खस्साति एकस्स कञ्चननिक्खस्स. सिङ्गीनिक्खस्साति सिङ्गीसुवण्णनिक्खस्स. पथवियाति चक्कवाळब्भन्तराय महापथविया. आमिसकिञ्चिक्खहेतूति कस्सचिदेव आमिसस्स हेतु अन्तमसो कुण्डकमुट्ठिनोपि. जीवितहेतूति अटवियं चोरेहि गहेत्वा जीविते वोरोपियमाने तस्सपि हेतु. जनपदकल्याणियाति जनपदे उत्तमित्थिया. ततियादीनि.

दुतियो वग्गो.