२. पुरिससुत्तवण्णना

११३. दुतिये अभिवादेत्वाति पुरिमसुत्ते सरणगतत्ता इध अभिवादेसि. अज्झत्तन्ति नियकज्झत्तं, अत्तनो सन्ताने उप्पज्जन्तीति अत्थो. लोभादीसु लुब्भनलक्खणो लोभो, दुस्सनलक्खणो दोसो, मुय्हनलक्खणो मोहोति. हिंसन्तीति विहेठेन्ति नासेन्ति विनासेन्ति. अत्तसम्भूताति अत्तनि सम्भूता. तचसारंव सम्फलन्ति यथा तचसारं वेळुं वा नळं वा अत्तनो फलं हिंसति विनासेति, एवं हिंसन्ति विनासेन्तीति. दुतियं.