२. दुतियकस्सपसुत्तवण्णना

८३. दुतिये झायीति द्वीहि झानेहि झायी. विमुत्तचित्तोति कम्मट्ठानविमुत्तिया विमुत्तचित्तो. हदयस्सानुपत्तिन्ति अरहत्तं. लोकस्साति सङ्खारलोकस्स. अनिस्सितोति तण्हादिट्ठीहि अनिस्सितो, तण्हादिट्ठियो वा अनिस्सितो. तदानिसंसोति अरहत्तानिसंसो. इदं वुत्तं होति – अरहत्तानिसंसो भिक्खु अरहत्तं पत्थेन्तो झायी भवेय्य, सुविमुत्तचित्तो भवेय्य, लोकस्स उदयब्बयं ञत्वा अनिस्सितो भवेय्य. तन्तिधम्मो पन इमस्मिं सासने पुब्बभागोति. दुतियं.