२. रथसुत्तवण्णना

७२. दुतिये पञ्ञायति एतेनाति पञ्ञाणं. धजो रथस्साति महन्तस्मिं हि सङ्गामसीसे दूरतोव धजं दिस्वा ‘‘असुकरञ्ञो नाम अयं रथो’’ति रथो पाकटो होति. तेन वुत्तं ‘‘धजो रथस्स पञ्ञाण’’न्ति. अग्गिपि दूरतोव धूमेन पञ्ञायति. चोळरट्ठं पण्डुरट्ठन्ति एवं रट्ठम्पि रञ्ञा पञ्ञायति. चक्कवत्तिरञ्ञो धीतापि पन इत्थी ‘‘असुकस्स नाम भरिया’’ति भत्तारं पत्वाव पञ्ञायति. तस्मा धूमो पञ्ञाणमग्गिनोतिआदि वुत्तं. दुतियं.