१०. लोकसुत्तवण्णना

७०. दसमे किस्मिं लोको समुप्पन्नोति किस्मिं उप्पन्ने लोको उप्पन्नोति पुच्छति. छसूति छसु अज्झत्तिकेसु आयतनेसु उप्पन्नेसु उप्पन्नोति वुच्चति. छसु कुब्बतीति तेसुयेव छसु सन्थवं करोति. उपादायाति तानियेव च उपादाय आगम्म पटिच्च पवत्तति. विहञ्ञतीति तेसुयेव छसु विहञ्ञति पीळियति. इति अज्झत्तिकायतनवसेन अयं पञ्हो आगतो, अज्झत्तिकबाहिरानं पन वसेन आहरितुं वट्टति. छसु हि अज्झत्तिकायतनेसु उप्पन्नेसु अयं उप्पन्नो नाम होति, छसु बाहिरेसु सन्थवं करोति, छन्नं अज्झत्तिकानं उपादाय छसु बाहिरेसु विहञ्ञतीति. दसमं.

अद्धवग्गो सत्तमो.