८. उप्पथसुत्तवण्णना

५८. अट्ठमे रागो उप्पथोति सुगतिञ्च निब्बानञ्च गच्छन्तस्स अमग्गो. रत्तिन्दिवक्खयोति रत्तिदिवेहि, रत्तिदिवेसु वा खीयति. इत्थी मलन्ति सेसं बाहिरमलं भस्मखारादीहि धोवित्वा सक्का सोधेतुं, मातुगाममलेन दुट्ठो पन न सक्का सुद्धो नाम कातुन्ति इत्थी ‘‘मल’’न्ति वुत्ता. एत्थाति एत्थ इत्थियं पजा सज्जति. तपोति इन्द्रियसंवरधुतङ्गगुणवीरियदुक्करकारिकानं नामं, इध पन ठपेत्वा दुक्करकारिकं सब्बापि किलेससन्तापिका पटिपदा वट्टति. ब्रह्मचरियन्ति मेथुनविरति. अट्ठमं.