३. मित्तसुत्तवण्णना

५३. ततिये सत्थोति सद्धिंचरो, जङ्घसत्थो वा सकटसत्थो वा. मित्तन्ति रोगे उप्पन्ने पाटङ्किया वा अञ्ञेन वा यानेन हरित्वा खेमन्तसम्पापनेन मित्तं. सके घरेति अत्तनो गेहे. तथारूपे रोगे जाते पुत्तभरियादयो जिगुच्छन्ति, माता पन असुचिम्पि चन्दनं विय मञ्ञति. तस्मा सा सके घरे मित्तं. सहायो अत्थजातस्साति उप्पन्नकिच्चस्स यो तं किच्चं वहति नित्थरति, सो किच्चेसु सह अयनभावेन सहायो मित्तं, सुरापानादिसहाया पन न मित्ता. सम्परायिकन्ति सम्परायहितं. ततियं.