१०. कविसुत्तवण्णना

६०. दसमे छन्दो निदानन्ति गायत्तिआदिको छन्दो गाथानं निदानं. पुब्बपट्ठापनगाथा आरभन्तो हि ‘‘कतरच्छन्देन होतू’’ति आरभति. वियञ्जनन्ति जननं. अक्खरं हि पदं जनेति, पदं गाथं जनेति, गाथा अत्थं पकासेतीति. नामसन्निस्सिताति समुद्दादिपण्णत्तिनिस्सिता. गाथा आरभन्तो हि समुद्दं वा पथविं वा यं किञ्चि नामं निस्सयित्वाव आरभति. आसयोति पतिट्ठा. कवितो हि गाथा पवत्तन्ति. सो तासं पतिट्ठा होतीति. दसमं.

जरावग्गो छट्ठो.